Hoppid 78er

Du findscht hie alls waas uber iis als Jahrgänger gid. Fotos und Wideos vo frieieren Träffen, iis als Hoseschiiser, Klassefotos fo frieier und alli Infos wes den umhi es Jahrgängerträffen gid…

Mier wischen dr vil Spass

Lang heider miesse warte, wäg Corona und suschtige Schtolpersteine, aber am 21. Oktober 2023 isches sowiit gsiin, iisa vierta Jahrgänger.

Mier heinis am drii am Bahnhof troffen und natiirlich afen eis doorfed. Naanem churze Spaziergang ubere Gee heds im Walz bi Michel Bruni am trochenen eppis fiechts gäge turscht und eppis feins als Apero gän.

Am spätere Namittag heimer is ids Hasli verschoben und zuefällig afen es biszli Märt Luft gschnuppered, old dsminischt Putschbahn-Luft. Im "The green Harp Pub" heds due umhi flissigs gän. Es chliins Dart Turnier und es par schlick später heds en huufen gschnäpper gän, wa jeda na luscht und luunen hed chennen dringriifen. Die pächschwarzen uberdimensionaalen Burger siin optisch nid ganz so achon, aber gschmacklich fein gsiin.

Naar uufleesig vom Jahrgänger Quiz heds no en Stichentscheid mittels "Stadt-Land-Fluss-Vollpfosten" bruucht bis ds zuefällig zämgewirfleta Gwinner Team erkore worden ischt. Nam Caffe und Chuechen isch gheerig wiiter truuchen, diskutierd und brichted worden. Es par siin midenem Tagsi, naa Mitternacht uufbrochen, ander hein irer Chind midem 7 Plätzer psteld und der räschten hed du naa den drii la Fiiraben machen und ischt midem Moonliner am halbi 4i richtig Brienz adghuscht.

Merci allne wa sii chon, es ischt braav, churzwiilig und tschent gsiin!

Chrigel